細個嗰陣，曾經幻想過有朝一日，要開間7仔或OK便利店，自己開檔做生意收錢。中學時，試過暑假做7仔part time，記得老闆夫婦一日24小時輪流睇檔，經常媽媽聲話辛苦，及後附近開多間頂爛市，間7仔最後做了幾年就執笠，變了對手OK開舖。
今日OK便利店阿媽利亞零售（831）公佈業績，睇完盤數，我終於明白前老闆最後忠告：「有得揀，唔好開便利店！」
去年香港OK便利店有328間，生意額係36.93億元，平均每間每年收入1,126萬元。除開每一日，每間舖有3.08萬蚊生意。睇落似乎唔錯，但計晒舖租、人工及燈油火蠟等等，328間舖未扣稅前的經營利潤係1.59億元，即係每100蚊生意，只賺4.3蚊。如果除開每間舖，一年賺48.4萬元，即係每日賺1,327蚊或者每個月賺4萬蚊（點解個收銀姐姐收到張金牛，會驗屍咁驗，大家請諒解）。
與7仔不同，香港OK店唔係特許經營，而係集團式經營。在規模經濟（Economies of scale）效應下，亦只能做到每間舖月賺4萬元，更何況特許經營的7仔，又加盟費、又上架費，做到半死，都係只賺到份糧。好聽叫創業，查實係被勞役。
